هو يقول …هي تقول ….. أنت ماذا تقول ؟ الجزء الثاني

هي تقول : ؟؟؟

هلء سمعنا الزوج العزيز شو حكى، اجا دورنا نحكي. احمممم

هلء انا الصراحة كنت متخيلة (وكل البنات هيك حتى لو قالو العكس) انو لمن لح اتجوز لح كون اميرة ببيتي…….. سندريلا بكل معنى الكلمة …. طول اليوم لابسة هالكندرة الكريستال وعم بتفتل انا وعم بلعب بخصل شعري الشقرة المسشورة، وجوزي قاعد ناحي ماسك بايدي وعم يطلع بعيوني. بس ما تخيلت هالكندرة الكريستال لح تقلب شحاطة نايلون للشطف وانو لح تمر علي ايام لح انسى فيها مشط شعري. وانو جوزي ما لح شوفو الا بالمناسبات اللي لح يكون جاية فيها على حامل على كتفو ترس عفواً قصدي بطيخة طول الطريق عم يدعي فيها “يا رب تطلع حمرة”!!!!!!!!!!!!

هلء المرة عم تلعب دور انها تنسي جوزها يقلها حكي حلو احياناً، هدا شي مفروغ منو …..

بس الوقت متل ما قلت عم يسرق العالم وانا مقدرة هالشي، يعني لما بكون يا دوبها ملحقة الطبخة ولساتها بتياب الشغل وعم تفكر وتدعي انو “يا رب السرفيس اللي راكبو جوزي يبنشر مشان لحق غير تيابي ومشط شعري وبخلي شي رشة برفان” بكون وقتها المرة فهمانة قصدك تمام. بس هي مو حجة تحطوها. كلياتنا ميت قلبنا من الشغل والعالم واننا مضطرين نضحك بوش هاد ونبتسم لهداك لدرجة انو صارت الضحكة مرسومة تاتو على وشنا غصبن عنها بس بضلها المرة حنونة وحكيها حلو، ليش؟؟؟؟؟؟اشمعن يعني؟؟؟؟؟؟؟ نحنا ما عم نطلب منك ترجع من الشغل تمسك ايد مرتك وتحملها من عالباب وتقلها اشتقتلك حياتي متل الافلام المكسيكية! ونحنا ما بدنا الرجال طول مانو قاعد ما ورا شغلة غير حبي وعمري، وروحي وتكفنيني وتقبشيني وتشكلي آسي، ابداً. ولا بدنا ياه يكون متل دكتور فل، ساحب ايد مرتو واخدها معو عهالشغل سري مري وعم يمدح فيها، نحنا مو هاد طلبنا، يعني بنعرف الرجال بكون راجع عالبيت كرهان حالو ، بس كمان المرة يعني اللي ما بتكون عم تشتغل بتكون قرفانة عيشتا بالبيت من الولاد هي كمان ، وهي التانية بتكون مانها طايقة حالها. خليني اضربلكن مثال: المرة ما بدها لما تخلص الطبخة يقلها جوزها هاتي اناملك لبوسن تقبريني شو طيب الاكل ابدا، المرة بدها واحد يقلها يسلمو ايديكي والله طيبين، واذا ما بدو يقول هالكلمتين فعلى القليلي ما يقلها: طيبين هالاكلات شو امي باعتتلنا طبخ!!! فهمت علي؟

يعني لازم يكون في لحظة من اليوم حتى لو خمس دقايق او يوم بالسبوع يكون الزوجين برات دائرة الملل والهم هدا…..يقعدوا فيها التنين مع بعض، ينسو الدنيا كلا ويكبوها ورا ضهرن ويحكو فيها مع بعض، يعني انت لما قلت انو لما بنفضى بنحكي عن العيلة هدا مو غلط، انا احلى وقت عندي لما بقعد مع جوزي وبنحكي عن مشاريعنا ومستقبلنا، بس الصح الصيغة اللي بينقال فيها هالحكي. يعني الرجال بيضحك وبقول انو المرة عقلها قليل وبتحب ينضحك على عقلها بكلمتين حلوين…….طيب ليش الرجال مانو اذكية كفاية انو يستغلو هالنقطة لصالحن ويكسبونا؟؟؟؟؟؟؟ انا من جهتي لما بقلي جوزي شو طابخة، بقوم بسخنلو الاكل، عادي يعني، بس لما بقلي عمري ميت من الجوع، بصير بركد ركيد حتى جهزلو الغدا. يعني طلبنا مو الكلمة بحد ذاتها وايمتى ما كان بس الكلمة الحلوة تطلع بوقتها مو غلط أبداً. فاكسبونا وحاكونا حكي حلو.

ليش انا لازم تكون اولويتي جوزي، وجوزي بتكون اولويتو شغلو؟؟؟؟ لازم تنيناتنا تكون اولوياتنا العيلة اولاً.

ليش ممنوع دق لجوزي بقلب النهار لاني مشتاقة اسمع صوتو؟؟؟؟؟؟ ليش تحديد المكالمات معو بعدد معين مع تفضيل إلغاءها؟؟؟؟؟؟

يعني لما بنحس انو كلمة حبيبتي صارت ما تطلع الا تقيلة فالجو بالبيت اكيد مكهرب وصار لازم نقدر انو الوقت صار مناسب ناخد إجازة ونبعد عن المشاكل. بس نحنا حتى ما عاد عنا وقت نحل مشاكلنا مع تفاهتها. شو قولك بيعطونا اجازة؟؟؟؟؟؟؟؟

القسم الثاني من تألف الزميله ( دارين أكريم شلبي )

7/8/2006